Ընդդիմությունը չի ուզում հարցաքննել Փաշինյանին․ փաստարկները համոզիչ չեն

Ազգային ժողովի պաշտպանության և անվտանգության հարցերի հանձնաժողովը երեկ նիստ է գումարել և կողմ քվեարկել 44-օրյա պատերազմի հանգամանքներն ուսումնասիրելու նպատակով քննիչ հանձնաժողովի աշխատակարգին։ Ընդդիմադիր «Հայաստան» և «Պատիվ ունեմ» խմբակցությունների չորս պատգամավորները լքեցին հանձնաժողովի դահլիճը՝ հրաժարվելով մասնակցել քննիչ հանձնաժողովի աշխատանքներին։

Ընդդիմությունն իր բոյկոտը բացատրում է այն հանգամանքով, որ իշխանությունները չեն կարող օբյեկտիվորեն քննել իրենց իսկ գործողությունները: «Օբյեկտիվ քննություն հնարավոր է, երբ որ քննիչ հանձնաժողովի մեծամասնությունը չի պատկանում այն քաղաքական ուժին, որի իշխանության օրոք սանձազերծվել է Ադրբեջանի կողմից պատերազմ Հայաստանի և Արցախի Հանրապետությունների նկատմամբ», - հայտարարել է ընդդիմադիր «Հայաստան» խմբակցության պատգամավոր Գեղամ Մանուկյանը:

Այն, որ գործող իշխանություններն ամեն ինչ անելու են պատերազմի հանգամանքների հետաքննությունը Նիկոլ Փաշինյանի և նրա թիմի արդարացման գործընթացի վերածելու համար, որևէ մեկի մոտ կասկած չի հարուցում։ Սակայն տարօրինակն ընդդիմության վարքագիծն է։ Ընդդիմադիր պատգամավորները կարող էին և պետք է մասնակցեին նիստերին, հնարավորություն ունենային հարցեր ուղղել թե՛ առաջինը հարցաքննվելու ցանկություն հայտնած Նիկոլ Փաշինյանին, թե՛ մյուս քաղաքական և ռազմական պատասխանատուներին։

Փոխարենը, ընդդիմությունը նախընտրում է բոյկոտը, որի պայմաններում որևէ կերպ չի կարող վերհանել իշխանության ապօրինությունները։ Նախքան դահլիճը լքելը բանավեճ տեղի ունեցավ ընդդիմադիր Գեղամ Նազարյանի և հանձնաժողովի նախագահ Անդրանիկ Քոչարյանի միջև։ Նազարյանը դժգոհեց, որ հանձնաժողովի ստեղծման որոշումը խնդրահարույց է։ «Ստեղծվում է սեպտեմբերի 27-ին սանձազերծված ռազմական գործողությունների հանգամանքները.... ո՞ւմ կողմից սանձազերծված, ի՞նչ ռազմական գործողություններ, նույնիսկ էն սկիզբը իրենք արդեն սխալ են դրել», - նշել է Նազարյանը: «Պարզ էր չէ՞, որ Ադրբեջանի կողմից, բայց այս պատերազմը կարող է պարզվի՝ ոչ միայն Ադրբեջանի կողմից էր», - արձագանքել է Անդրանիկ Քոչարյանը:

Լեզվական սայթաքո՞ւմ էր, թե՞ հստակ գիտակցված արտահայտություն, բարդ է ասել, սակայն Քոչարյանի խոսքից ակնհայտ է, որ գործող իշխանությունները մտադիր են մեղավոր կարգել ոչ միայն զինվորականությանը, այլև նախկիններին, որոնց շահերն էլ, ի դեպ, պետք է ԱԺ-ում պաշտպանեին ընդդիմադիր պատգամավորները։ Արդեն նիստից հետո իշխանական պատգամավորները հայտարարեցին, թե առաջին հրավիրյալներից մեկը կլինի վարչապետ Նիկոլ Փաշինյանը։ «Դա Նիկոլ Փաշինյանի ցանկությունն է, և ոչ միայն Նիկոլ Փաշինյանը, բա տենց հնարավորությունը մեր ընդդիմադիր գործընկերները ո՞նց իրանց ձեռքից բաց թողեցին, քանի ժամ ուզում էին, ինչ հարց ուզում էին», - ասել է հանձնաժողովի նախագահ Անդրանիկ Քոչարյանը:

Ըստ էության, ընդդիմությունը իշխանությանը շանս է տալիս՝ անել ինչ ցանկանում է, ինչպես ցանկանում է, և այդ ամենը՝ առանց դիմադրության։


Արշակ Ավագյան