Հայաստանի իշխանությունը պատրաստվում է երկաթուղի կառուցել Ադրբեջանի համար

Հայաստանի իշխանությունները պատրաստվում են երկաթուղի կառուցել Ադրբեջանն ու Նախիջևանը իրար միացնելու համար։ Շուրջ մեկ ամիս առաջ աշխատանքային խումբ է ձևավորվել, որը ղեկավարում է ոչ անհայտ Արտաշես Թումանյանը՝ ներկայումս Նիկոլ Փաշինյանի խորհրդական, իսկ նախկինում՝ Իրանում Հայաստանի դեսպան։

Աշխատանքային խումբը զբաղվում է երկաթուղու հայտնի հատվածի հայաստանյան տեղամասերի վերականգնման աշխատանքներ կառավարմամբ՝ Երասխի 1 կմ-ից ավելի հատվածը և Մեղրիի 45 կմ երկարությամբ հատվածը: Աշխատանքային խումբն այսօր երրորդ նիստն է գումարելու՝ քննարկելու երկաթուղու վերակառուցման հնարավորությունները, իսկ երկու շաբաթվա ընթացքում մասնագիտական խումբ կգործուղվի երկաթուղու երկու հատվածները։

Թումանյանը հայտնել է, թե հատկապես Մեղրիի որ հատվածն է այդ իմաստով խնդրահարույց, տեղում ինստրումենտալ գործիքային մանրամասն հետազոտություն անելու: Մինչ փաշինյանական իշխանությունը փորձում է շեղել ու մոլորեցնել հանրությանը, համոզել, թե «միջանցքային տրամաբանություն» չի լինելու, մյուս կողմից կատարում է Ադրբեջանի բոլոր ցանկությունները։ Արտաշես Թումանյանը նշել է, որ երկաթուղու կառուցումը կսկսվի, եթե պայմանավորվածություններն ամրագրվեն փաստաթղթով։ Սա, ըստ էության, նշանակում է, որ ինչ-որ պահի հայ ժողովրդին կրկին փաստի առաջ են կանգնեցնելու, մի գիշերում ստորագրեն փաստաթուղթը և այն, որպես կայացած իրողություն՝ հրամցնեն Հայաստանի բնակչությանը։

Բնական է, որ նման պայմաններում գնալով աճում է Ադրբեջանի ախորժակը։ Օրերս էլ Ադրբեջանի նախագահ Իլհամ Ալիևն էր հայտարարել, թե Ադրբեջանը նախատեսում է «Զանգեզուրի միջանցքով» նոր էլեկտրահաղորդման գիծ կառուցել։ «Մենք նախատեսում ենք նոր գիծ կառուցել Ադրբեջանից դեպի Նախիջևանի Ինքնավար Հանրապետություն «Զանգեզուրի միջանցքով», իսկ այնտեղից՝ Թուրքիա և Իրան։ «Զանգեզուրի միջանցքը» ոչ միայն երկաթուղի և ավտոմայրուղի է, այն իր դերն է ունենալու էներգառեսուրսների արտահանման գործում»,- ասել էր Ալիևը «Ազերթաջ» գործակալությանը տված հարցազրույցում։

Պաշտոնական Երևանը բազմիցս կրկնել է, որ ոչ մի «միջանցքների» մասին խոսք լինել չի կարող, հաղորդակցությունների բացումը ենթադրում է ազգային իրավազորություն։ Այս պնդմանը հավատալու հիմքեր առ այսօր որևէ ողջամիտ մարդ չունի։


Կարեն Ալավերդյան