Փաշինյանը նոր փորձանքներ է բերում իր անհեթեթ հայտարարություններով
ՎԵՐԼՈՒԾՈՒԹՅՈՒՆՆԵՐ
Հայաստանի վարչապետի աթոռը զբաղեցրած Նիկոլ Փաշինյանի ապիկարությունը սահմաններ չի ճանաչում, այդ անձը երեկ էլ աչքի է ընկել հերթական անհեթեթ հայտարարությամբ։ Ազգային ժողովում կառավարության հետ հարցուպատասխանի ընթացքում նա հայտարարել է, թե Հայաստանի միջազգային իմիջն ու բրենդը ժողովրդավարությունն է։
Մի կողմ թողնենք, որ միջազգային իրավապաշտպան կառույցներն են արձանագրում ՀՀ գործող իշխանությունների հակաժողովրդավար լինելու փաստը, իսկ ընդդիմադիրների դեմ քաղաքական հալածանքները, դատական իշխանության հախից գալու քայլերը, սեփական ժողովրդի դեմ ոստիկանական ուժերով կռիվ տալու հանգամանքը բնավ էլ ժողովրդավարության դրսևորում չեն։ Նիկոլ Փաշինյանն այդպես էլ չի գիտակցում, որ ժողովրդավարությունը «ապրանք» չէ, որ կարողանաս ծախել օտար պետությունների վրա։ Հակառակ դեպքում միջազգային հանրությունը Հայաստանին մենակ չէր թողնի հակաժողովրդավար Ադրբեջանի և Թուրքիայի դեմ պատերազմում։
«Միջազգային հարաբերություններում մաքուր ռեալիզմ է` ոչ մի կաթիլ ռոմանտիզմ։ Ռեժիմների հատկանիշը երկրորդական է, առաջնայինը շահերն են, անվտանգությունը, տնտեսությունը, պետությունների «քաշային կատեգորիաները»: Եթե այդքանը Փաշինյանը չի հասկացել, Հայաստանին նոր փորձանք է սպասվում»,- արձանագրում է քաղաքագետ Սուրեն Սուրենյանցը։
Ի դեպ, նույն նիստում Փաշինյանը հպարտությամբ է խոսել սեփական խոստումները չկատարելու մասին։ Հիշեցնելով բուհերի ապաքաղաքականացման իր խոստումը՝ Փաշինյանը հայտարարել է․ «Այո՛, ես խոստացել եմ։ Բայց արդյունքում պարզվեց, որ դրանցից մի քանիսում թաքնված են գաղտնի կուսակցական բջիջներ։ Ինչ-որ պահի այս բուհերը վերածվել են ընդդիմադիր բջիջների։ Ասում են նաև, որ մենք խոստացել ենք սահմանափակել դիվանագիտական ծառայությունում քաղաքական նշանակումները։ Սակայն այժմ մենք ասում ենք, որ դրանք չենք սահմանափակի բոլորիդ քաջ հայտնի պատճառներով»։
Ալեն Օհանյան
