Հայ-վրացական «մածնաբրդոշ»․ Հայաստանի իշխանությունները լռում են

Մինչ Ադրբեջանը յուրացնում է հայկական պատմամշակութային կոթողները, Վրաստանն էլ հընթացս իրենով է արել հայկական մածունը՝ արգելելով կաթնամթերքի տարհանումը Ռուսաստան իր տարածքով։ Երկու դեպքում էլ Հայաստանի իշխանությունների տոտալ լռության և անգործության պայմաններում։ Նախկին վարչապետ Հրանտ Բագրատյանն օրերս ահազանգեց, որ հայկական արտադրության մածունը` «մածուն» գրությամբ, չի կարող արտահանվել Վրաստան կամ այդ տարածքով Ռուսաստանի Դաշնություն, քանի որ այդ երկիրը որպես աշխարհագրական նշում է ձևակերպել «մացոնի»–ն։

Էկոնոմիկայի նախարարության փոխանցմամբ, դեռևս 2012 թվականից հայկական կողմը բողոք է ներկայացրել այդ մակնշման դեմ, սակայն առարկությունը հաշվի չի առնվել, վրացական «մացոնի»-ն էլ գրանցվել է։ Հայ արտադրողները ստիպված են ապրանքը արտահանել Ռուսաստան՝ «մածուն»-ի փոխարեն «սարի յոգուրտ» գրելով։ Վրացական կողմի այս լկտիությանն առայժմ հստակ արձագանք չկա, նախարարությունը դեռ նոր պետք է բանակցություններ վարի, պայմանավորվեն համաձայնագրի շուրջ, որպեսզի թյուրըմբռնումներ չլինեն։ Փոխարենը Վրաստանը հստակ ակնարկել է, որ մտադիր չէ զիջումների գնալ այս հարցում։ Երեկ երեկոյան իշխանական «Իմեդի» հեռուստաալիքի լուրերի գլխավոր թողարկման ժամանակ հաղորդավարները խոսել են մածունի արտահանման արգելքի մասին, իսկ հետին պլանում ապակյա տարաների վրա վրացերեն մեծ գրված է «մացուն», ապա հայերեն տառերով գրված են «Ղարաբաղը Ադրբեջան է», «Տոլման նույնպես ադրբեջանական է»։

Իշխանական ԶԼՄ-ի այս վարքը բնականաբար արտահայտում է Վրաստանի իշխանությունների մոտեցումը, վերաբերմունքը հարևան պետության նկատմամբ։ Փաստացի, Հայաստանի վարչախումբն իր ապիկարության ու անճարակության պատճառով ոչ միայն տարածքներ է կորցնում, հազարավոր երիտասարդների մահվան պատճառ դառնում, այլև կորցնում է մշակութային արժեքներն ու խոհանոցը։ Էլ ի՞նչ պիտի կորցնի Հայաստանը, որ վերջնականապես հասկանա փաշինյանական վարչախմբի գոյության վտանգները։

Արմեն Սերոբյան