Եվրոպան «գցում» է Փաշինյանին․ հայտարարությունից անհետացել է Արցախը

Երեկ երեկոյան կայացել է Ֆրանսիայի նախագահ Էմանուել Մակրոնի հեռավար տեսակոնֆերանսը Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի և Եվրոպական խորհրդի նախագահ Շառլ Միշելի հետ։ Հայաստանի կառավարության լրատվական ծառայությունից հայտնում են, որ կողմերը մտքեր են փոխանակել առկա հումանիտար խնդիրների լուծման, երկու երկրների ինքնիշխանության և իրավազորության ներքո տարածաշրջանային ենթակառուցվածքների ապաշրջափակման, ՀՀ-ԱՀ սահմանագոտում լարվածության նվազեցման և սահմանազատման, Լեռնային Ղարաբաղ միջազգային կազմակերպությունների ելումուտի, ինչպես նաև հարցերի լայն շրջանակի վերաբերյալ։ Վարչապետ Փաշինյանն ընդգծել է ԵԱՀԿ Մինսկի համանախագահության ներքո Լեռնային Ղարաբաղի հակամարտության երկարաժամկետ կարգավորման և խաղաղության համաձայնագրի կնքման անհրաժեշտությունը։

Այդուհանդերձ, Ֆրանսիայի և Եվրոպայի խորհրդի նախագահների համատեղ հայտարարության մեջ մեկ բառ անգամ հիշատակված չէ ո՛չ Արցախը, ո՛չ հակամարտության խաղաղ կարգավորումը։

«Նախագահ Մակրոնն ու նախագահ Միշելը հաստատել են իրենց լիարժեք հակվածությունը տարածաշրջանում լարվածությունը նվազեցնելուն ու վստահությունն ամրապնդելուն ուղղված ջանքերին աջակցելու ուղղությամբ: Նրանք գնահատել են առաջընթացը, որը ձեռք է բերվել Արևելյան գործընկերության գագաթնաժողովի շրջանակում տեղի ունեցած հանդիպումներից հետո, մասնավորապես, վերջերս գերիների ազատագրման, շարունակվող համատեղ անհետ կորածներին որոնելու գործում, ինչպես նաև առաջիկայում երկաթուղու վերականգնումը: Պետությունների և կառավարությունների ղեկավարները համաձայնել են, որ այդ հանդիպումն արժեքավոր հնարավորություն է ներկայացրել հարցերի լայն շրջանակ քննարկելու համար: ԵՄ-ն ու Ֆրանսիան դեռևս հակված են աշխատել ուրիշ գործընկերների, այդ թվում՝ ԵԱՀԿ-ի հետ, բարգավաճող, անվտանգ և կայուն Հարավային Կովկաս կառուցելու համար»,-ասվում է հայտարարության մեջ:

Այս հանդիպումից հետո տեղեկություն տարածվեց, որ Եվրամիությունը կհատկացնի Ադրբեջանին 2 միլիարդ եվրոյի չափով ֆինանսական փաթեթ։ Դրացիության և ընդլայնման գծով եվրահանձնակատար Օլիվեր Վարխելին Ադրբեջանի ԱԳՆ Ջեյհուն Բայրամովի հետ հանդիպմանը հայտնել է, թե Բրյուսելը կհատկացնի այդ գումարը տնտեսական ներդրումային պլանի շրջանակում: Ըստ էության, Եվրոպան այս տեսակոնֆերանսով և Ադրբեջանին հսկայական գումար հատկացնելով ՀՀ իշխանություններին, ազդակներ է հղում՝ մեծ հավակնություններ չունենալու, կոպիտ ասած՝ «տեղը սթրվելու» վերաբերյալ։ Հայաստանյան արևմտամետներից, իհարկե, քննադատական որևէ արձանագրում մենք այդպես էլ չենք տեսնի։

Արմեն Ներսիսյան