Արմեն Սարգսյանը մտադիր չէ հեռանալ․ ինչո՞ւ հրաժարական տվեց

Արմեն Սարգսյանը հետ չվերցնի հրաժարականի դիմումը, նրա լիազորությունները կդադարեն։ Հայաստանի նախագահը հրաժարականի դիմում էր ներկայացրել հունվարի 23-ին։ Արդեն հաջորդ օրը ԱԺ նախագահ Ալեն Սիմոնյանը խորհրդարանում հրապարակեց նրա դիմումը, ինչից հետո Սարգսյանը, ՀՀ Սահմանադրությամբ, մեկ շաբաթ ժամանակ ունի մտքափոխվելու համար։ Սարգսյանն, ըստ ամենայնի, հետ չի վերցնելու հրաժարականի դիմումը։ Այսօր՝ ժամը 18-ից սկսած՝ ՀՀ նախագահի պարտականությունները կատարելու է Ալեն Սիմոնյանը, իսկ ԱԺ նախագահի պաշտոնում նրան ժամանակավորապես կփոխարինի ամենաշատ ձայներ ստացած տեղակալը՝ Հակոբ Արշակյանը։ Նոր նախագահին կընտրեն 25-ից 35 օրվա ընթացքում։ Իսկ ինքը՝ Արմեն Սարգսյանը չի էլ վերադարձել Երևան։ Նա հրաժարականի դիմումն էլ ներկայացրել էր՝ գտնվելով Լոնդոնում։ Թեև իր հայտարարության մեջ նախագահը մի շարք պատճառներ է նշում, թե ինչու է հրաժարվում նախագահի պաշտոնից, նրա աշխատակազմն էլ տարակուսած է թե՛ այդ հրաժարականից, թե՛ վերջին մեկ շաբաթում Արմեն Սարգսյանի աննախադեպ ակտիվությունից։

ՀՀ նախագահի պաշտոնական կայքը ամեն օր նոր հաղորդագրություններ և հայտարարություններ է տարածում, Արմեն Սարգսյանը պաշտոնը լքելուց առաջ փորձում է ցույց տալ հանրությանը, թե աշխատում է, նաև ինչ-ինչ քողարկված նպատակներ ունի։ Սարգսյանը, ով պաշտոնավարման օրոք առանձնակի ակտիվություն չի ցուցաբերել, աչքի է ընկել միայն գործող վարչախմբի որոշումները դակելով, և միայն մեկ անգամ է դիրքորոշում հայտնել՝ պահանջելով Նիկոլ Փաշինյանի հրաժարականը, միակ պաշտոնյան էր, ով Բանակի օրվան նվիրված իր ուղերձում հիշատակել էր ռազմագերիների անհապաղ ազատ արձակման մասին։ Մեր տեղեկություններով՝ Արմեն Սարգսյանը բնավ մտադիր չէ հեռանալ քաղաքականությունից և Հայաստանից։ Կանխատեսելով հնարավոր մոտալուտ լուրջ զարգացումները, չցանկանալով իր վրա վերցնել այդ զարգացումների և դրանց հետևանքների պատասխանատվությունը՝ Սարգսյանը, մեր աղբյուրի փոխանցմամբ, լրջորեն մտածում է քաղաքական որևէ ուժ ստեղծելու կամ եղածներից մեկը գլխավորելու, Հայաստանում ազդեցություն ունենալու մասին։ Չի բացառվում, որ նա փորձի քաղաքականություն մտնել, օրինակ, «Հանուն Հանրապետության» կուսակցությամբ, որի նախագահ Արման Բաբաջանյանն այս օրերին բուռն հարցազրույցներ է տալիս, իր աջակցությունը հայտնում Արմեն Սարգսյանին։ Թեև, լուրեր են շրջանառվում, որ Սարգսյանը մտադիր է մի քանի ուժերի կոնսոլիդացնել իր շուրջ՝ այդկերպ ավելի լայն էֆեկտ ապահովելու նպատակով։ Այդ նպատակի իրագործման ճանապարհին Սարգսյանը մտադիր է աջակցություն ստանալ արևմտամետ ուղղվածություն ունեցող բոլոր քաղաքական ուժերից և համապատասխան դիվանագիտական կառույցներից։ Կստացվի՞, թե՞ ոչ, բարդ է ասել։

Խաչատուր Միքայելյան