Գինցբուրգն անհրաժեշտ է համարել երեխաների 70-80 տոկոսին կորոնավիրուսի դեմ պատվաստումը

Երեխաների շրջանում COVID-19-ի նկատմամբ կոլեկտիվ իմունիտետի ստեղծման համար կորոնավիրուսի դեմ պատվաստման տոկոսը պետք է այնպիսին լինի, ինչպես չափահասների մոտ՝ 70-80 տոկոս: Այդ մասին հայտնել է Ռուսաստանի առողջապահության նախարարության Գամալեայի անվան կենտրոնի ղեկավար, Ռուսաստանի գիտությունների ակադեմիայի ակադեմիկոս Ալեքսանդր Գինցբուրգը, տեղեկացնում է «Արմենպրես»-ը:

«Ես դրան ուղիղ ձևով կպատասխանեմ. երեխաները նույնպես մարդ են ևոչնչով չեն տարբերվում. հարկավոր է պատվաստել նույն 70-80 տոկոսին, ինչը և մեծահասակների մոտ է: Բայց պատվաստումը կլինի, իհարկե, միայն ծնողների համաձայնությամբ»,-ասել է Գինցբուրգը՝ պատասխանելով համապատասխան հարցին: Նա նշել է, որ երեխաներն սկսել են հիվանդանալ շատ ավելի հաճախ, քանի որ այդ տարիքային խմբում պատվաստում չի անցկացվել, և ընդգծել է կորոնավիրուսի դեմ պատվաստումների կարևորությունը: Գինցբուրգի խոսքով՝ կորոնավիրուսի դեմ «Սպուտնիկ» պատվաստանյութը 6-ից մինչև 11 տարեկան երեխաներին պատվաստելու համար կարող է հասանելի դառնալ արդեն այս գարնանը:

Հունվարի 24-ին Ռուսաստանի առողջապահության նախարարությունը թույլատրել է 6-ից մինչև 11 տարեկան երեխաների համար «Գամ-Կովիդ-Վակ-Մ» դեղորայքային պատրաստուկի («Սպուտնիկ M») կլինիկական հետազոտությունների 1-3-րդ փուլը: Հետազոտությանը պետք է մասնակցի 2200 կամավոր, դրա ավարտը պլանավորված է 2023 թվականի դեկտեմբերի 31-ին: Փորձարկումները կանցկացվեն մոսկովյան երեք հարթակներում: Գինցբուրգի խոսքով՝ առաջին երկու փուլերին կմասնակցի մինչև 200 կամավոր: Նոյեմբերի 24-ին ՌԴ առողջապահության նախարարությունը գրանցել է 12-ից մինչև 17 տարեկան դեռահասների համար պատրաստուկի տարբերակը: Այն իրենից ներկայացնում է չափահասների համար կիրառվող «Սպուտնիկ V»-ի 1/5 չափաբաժինը:  Անցած շաբաթ տարածաշրջաններն սկսել են հաղորդել բուժհաստատություններում պատրաստուկի առաջին խմբաքանակներն ստանալու մասին: