Դատախազության և Հակակոռուպցիոն կոմիտեի վեճը կհասնի՞ դիվանբաշուն
ՎԵՐԼՈՒԾՈՒԹՅՈՒՆՆԵՐ
Կոռուպցիոն հանցագործությունների համար մեղադրվող ու արդեն երեք տարի հետախուզվող բնապահպանության նախկին նախարար Արամ Հարությունյանի գործը ևս դատախազությունը վերադարձրել է Հակակոռուպցիոն կոմիտե՝ լրացուցիչ քննության։ Վերջին երկու օրվա ընթացքում սա արդեն երկրորդ հնչեղ գործն է, որ այս ճակատագրին է արժանանում։
Ավելի վաղ դատախազությունը նույն կերպ վարվել էր նախկին ոստիկանապետ Վլադիմիր Գասպարյանի գործի դեպքում։ Դատախազությունն ու հակակոռուպցիոն կոմիտեն նույնիսկ հաղորդագրությունների միջոցով հրապարակային էին դարձրել իրենց տարաձայնությունները։ Վերահսկող դատախազը չի հաստատել Արամ Հարությունյանի մեղադրականը. սա իրավապահների գնահատմամբ՝ Հայաստանի պատմության մեջ ամենախոշոր կաշառքի գործն է։ Խոսքը 14 միլիոն դոլար կաշառքի, փողերի լվացման և կոռուպցիոն այլ չարաշահումների մասին է։ Դեռ Վլադիմիր Գասպարյանի գործը չընդունելու հետ կապված Հակակոռուպցիոն կոմիտեն հայտարարել էր, որ բողոքարկելու է դատախազի որոշումը վերադաս դատախազին։
Ավելին, կոմիտեն տարօրինակ մի հայտարարություն էր տարածել․ «Քանի որ վստահ ենք` նման կարևոր գործերով առանցքային որոշումները կայացվում են դատախազական ամենաբարձր մակարդակում, և այս գործը դատարան չուղարկելու որոշումը դատախազության միասնական դիրքորոշումն է»։
Նույն հաջողությամբ, Սասուն Խաչատրյանի ղեկավարած կառույցը կարող էր մեղադրել իրենց գլխավոր վերադասին՝ Նիկոլ Փաշինյանին։ Իսկ Գլխավոր դատախազության և Հակակոռուպցիոն կոմիտեի վեճը շարունակում է թեժանալ։ Հարց է, թե երբ է այն իրապես անհանգստացնելու Նիկոլ Փաշինյանին, որպեսզի վերջինս որոշում կայացնի, թե ով է լքելու իր պաշտոնը՝ Սասուն Խաչատրյա՞նը, թե՞ Արթուր Դավթյանը։ Երբ երկու պետական գերատեսչություններ իրար հետ կռվում են, դա ի վերջո հանգեցնում է նրանց ղեկավարներից մեկի պաշտոնանկությանը։ Թեև Նիկոլ Փաշինյանը սովորություն ունի տարբեր պաշտոնյաների իրար դեմ հանելու, նրանց հակասությունների վրա սեփական իշխանությունն ամրապնդելու, սա այդ դեպքը չէ։ Ի վերջո, հանրությունը վաղուց չի հավատում արդարադատություն իրականացնելու փաշինյանական խոստումներին, բայց Դատախազության ու Հակակոռուպցիոն կոմիտեի քաշքշուկները կարող են ավելի խորացնել ոչ միայն իշխանության նկատմամբ անվստահությունը, այլև հանգեցնել խորը ճգնաժամի։
Մանվել Մարտիրոսյան
