Ռուսաստանից 12 ռազմական ինքնաթիռ է մեկնել Ղազախստան

Ռուսական 12 ինքնաթիռները Ղազախստան են մեկնել մերձմոսկովյան «Չկալովսկի» օդանավակայանից: Տեղեկությունը հայտնում է ՌԴ պաշտպանության նախարարությունը։

«Ռուսական 12 Իլ-76 և Ան-124 ռազմատրանսպորտային ինքնաթիռները զինծառայողներին և տեխնիկան կհասցնեն Ալմաթիի և Ժետիգենի օդանավակայաններ»,– հայտնել են ՌԴ-ի ռազմական գերատեսչությունում:

Ավելի վաղ ՌԴ պաշտպանության նախարարությունը հայտնել էր, որ ռուս դեսանտայինները լիակատար վերահսկողություն են սահմանել Ալմաթիի օդանավակայանի նկատմամբ:

Ռուսական խաղաղապահ ուժերի կազմում ընդգրկված են օդադեսանտային զորքերի 45–րդ առանձին բրիգադի, օդադեսանտային օդուժի 98-րդ դիվիզիայի և օդադեսանտային զորքերի 31-րդ առանձին բրիգադի ստորաբաժանումները: Ռուսական զորակազմի բոլոր զինծառայողները հատուկ պատրաստություն են անցել և մարտական փորձ ունեն։

Ռուսաստանի ՊՆ–ից հայտնել էին նաև, որ ռուս խաղաղապահների տեղափոխման համար ստեղծվել է Իլ-76 և Ան-124 ինքնաթիռներից բաղկացած օդային խմբավորում, որը ՀԱՊԿ խաղաղապահ ուժերի ռուսական զորակազմի ստորաբաժանումները շուրջօրյա ռեժիմով տեղափոխում է Ղազախստան:

ՀԱՊԿ-ի խաղաղապահ ուժերի կազմում ընդգրկվել են Ռուսաստանի Դաշնության, Բելառուսի, Հայաստանի, Տաջիկստանի և Ղրղզստանի զինված ուժերի ստորաբաժանումները: ՀԱՊԿ-ի խաղաղապահ զորակազմի թվաքանակը Ղազախստանում կազմում է մինչև 2,5 հազար մարդ:

Ղազախստանում ՀԱՊԿ խաղաղապահ ուժերի գործողությունները ղեկավարում է ՌԴ օդադեսանտային զորքերի հրամանատար, գեներալ-գնդապետ Անդրեյ Սերդյուկովը:

ՀԱՊԿ Հավաքական խաղաղապահ ուժերի հիմնական խնդիրներն են պետական և ռազմական կարևոր օբյեկտների պահպանությունը, իրավիճակի կայունացումն ու Ղազախստանի Հանրապետության իրավապահ մարմիններին աջակցելը։

Հիշեցնենք` Ղազախստանում բողոքի զանգվածային ցույցեր էին սկսվել 2022 թվականի հունվարի առաջին օրերին։ Հունվարի 4–ին և 5-ին Ալմաթիում բախումներ էին տեղի ունեցել ցուցարարների և ուժայինների միջև։ Ոստիկանները կիրառել էին գազ և խլացուցիչ նռնակներ։

Ամբողջ Ղազախստանում անջատվել է համացանցային կապը, ժամանակավորապես դադարեցվել է մի շարք հեռուստաալիքների հեռարձակումը։

Հունվարի 5-ին Ղազախստանի նախագահ Կասիմ-Ժոմարտ Տոկաևը երկրում երկշաբաթյա արտակարգ դրություն է մտցրել։ Նա օգնության համար դիմել է Հավաքական անվտանգության պայմանագրի կազմակերպությանը։

ՀԱՊԿ-ը իրավիճակը կայունացնելու համար խաղաղապահ զորախումբ է ուղարկել Ղազախստան, որոնց թվում 100 զինծառայող կա Հայաստանից։

Ղազախստանի ՆԳՆ–ի տվյալներով` ներկա պահին Ղազախստանում 3811 մարդ է ձերբակալվել, 26-ը չեզոքացվել են, 26-ը վիրավոր են: