Թուրքիան շտապեցնում է Փաշինյանին

Հայաստանի և Թուրքիայի հատուկ ներկայացուցիչների առաջին հանդիպումը տեղի կունենա հունվարի 14-ին Մոսկվայում։ Տեղեկությունը երեկ հրապարակել է Հայաստանի ԱԳՆ մամուլի քարտուղար Վահան Հունանյանը։ Եվ տարօրինակ կերպով, առաջին անգամն է, երբ հայ-թուրքական մերձեցմանը վերաբերող տեղեկությունը հանրությունը ստանում է ոչ թե Թուրքիայի ԱԳ նախարար Չավուշօղլուից, այլ Հայաստանի ԱԳՆ-ից։

Հիշեցնենք, որ թուրքական կողմից բանագնացը ԱՄՆ-ում նախկին դեսպան, 37 տարվա դիվանագիտական փորձ ունեցող Սերդար Քըլըչն է, հայկական կողմից նշանակվել է ԱԺ փոխնախագահ Ռուբեն Ռուբինյանը՝ դիվանագիտական հմտություններից զուրկ մի անձնավորություն, որի միակ «արժանիքը» Փաշինյանի մերձավոր լինելն է։ Հայ փորձագիտական հանրությունը շաբաթներ շարունակ ահազանգում է՝ այդ բանակցությունները հերթական հարվածն են լինելու Հայաստանին և նրա ինքնիշխանությանը, սակայն Նիկոլ Փաշինյանը խաղաղության դարաշրջան բացելու իր մոլուցքի մեջ պատրաստ է ոտատակ տալ թե՛ Հայոց ցեղասպանության միջազգային ճանաչման գործընթացը, թե՛ 44-օրյա պատերազմում Թուրքիայի հանցագործությունների համար գործընթաց սկսելու պարտավորությունը։ Թուրքիան իր հերթին ձգտում է հնարավորինս արագ անցնել բանակցային փուլին։

ԱԳ նախարար Մևլյութ Չավուշօղլուն նախօրեին ջերմ հայտարարություններ է արել թե՛ ԱԳ նախարար Արարատ Միրզոյանի, թե՛ բանագնաց Ռուբինյանի հասցեին։ Չավուշօղլուն նաև խոստովանել էր, որ դեռ դեկտեմբերի սկզբին Ստոկհոլում զրուցել և ընկերացել է Արարատ Միրզոյանի հետ։ Ստոկհոլմում Միրզոյանը բազմաթիվ այլ պաշտոնյաների հետ էր հանդիպել ու զրուցել, ամեն հանդիպման մասին ծավալուն հաղորդագրություն տարածել, բայց Չավուշօղլուի հետ հանդիպման մասին «մոռացել» էր։ Հայ-թուրքական արձանագրությունների ձախողումից հետո, երբ պարզ դարձավ, որ Հայաստանը չի հրաժարվելու Ցեղասպանության միջազգաին ճանաչումից, իսկ Թուրքիան այդպես էլ չվավերացրեց արձանագրությունները, այսօր Թուրքիայի համար եզակի շանս է ստեղծվել։ Հայաստանում այլևս ջախջախված, ապազգային և դավադիր խմբակ է իշխանության ղեկին, որի միակ նպատակը ամեն գնով իշխանություն պահելն է։ Այդ փաստը, թերևս, Թուրքիան ձեռքից բաց թողնել չի կարող։

Մարատ Վարդանյան