Կարգալույծ եկեղեցականը չցանկացավ ապաշխարության շրջան անցնել և վերադառնալ իր հոգևոր ծառայությանը
ՀԱՍԱՐԱԿՈՒԹՅՈՒՆ
Սույն թվականի դեկտեմբերի 29-ին «Հրապարակ օրաթերթ»–ում լույս տեսած «Մայր Աթոռի խոսնակը սովորական խոսնակ չէ, որ շտապի հերքել լուրը, հետո «սուտը բռնվի»» հոդվածի առնչությամբ հարկ եմ համարում նշել, որ դեկտեմբերի 1-ի դրությամբ, Տեր Ղազար քհն․ Պետրոսյանի կարգալուծության հարց Մայր Աթոռ Սուրբ Էջմիածնի կարգապահական հանձնախմբում չէր քննարկվում։
«Հրապարակ օրաթերթ»–ին տված իմ պարզաբանման մեջ այդ մասին արդեն նշել եմ։ Տվյալ հարցազրույցից հետո նույն օրաթերթում հրապարակվեց Մասյացոտնի թեմի
Առաջնոդ Գերաշնորհ Տ․ Գևորգ եպիսկոպոս Սարոյանի նամակը ուղղված Տեր Ղազարին, որտեղ Սրբազանը զգուշացնում է տեր հորը հոգևորականի առաքելությանն անհարիր կուսակցական գործունեությամբ ու քարոզչությամբ չզբաղվել, այլապես ստիպված է լինելու հարցը ներկայացնել Մայր Աթոռ Սուրբ Էջմիածնի կարգապահական հանձնախմբին։
Գևորգ Սրբազանի զգուշացում–նամակը Տեր Ղազարին չի ենթադրում, որ հարցը ներկայացված էր Մայր Աթոռի կարգապահական հանձնախմբին կարգալուծության համար։
Ավելին ասեմ։ Տեր Ղազարին կարգալույծ անելու նպատակ չի եղել։ Պարզապես տեր հոր անհնազանդ կեցվածքը հանգեցրեց դեպքերի նման զարգացմանը։ Հարցը պարզաբանելու համար Տեր Ղազարը երկու անգամ հրավիրվեց հանդիպման Մայր Աթոռի կարգապահական հանձնախմբի հետ, երկու դեպքում էլ վերջինս չներկայացավ (երկրորդ հրավերին անգամ փորձեց պայմաններ թելադրել հանդիպման ձևաչափի շուրջ)։ Այս ամենից հետո նրան հրավիրեց Վեհափառ Հայրապետը՝ ցանկանալով տեր հորը ևս մեկ հնարավորություն ընձեռել՝ վերանայելու իր ընթացքը, սրբագրելու կատարած սխալները և ի վերջո որոշակի օրերի ընթացքում որոշում կայացնելու իր հետագա ծառայության առնչությամբ։ Սակայն նա Նորին Սրբության առաջարկն էլ թողեց անպատասխան, որով իր որոշումն առավ՝ հրաժարվելով օգտվել Ամենայն Հայոց Կաթողիկոսի հայրական ընդառաջումից։ Այս ամենից հետո միայն կայացվեց տեր հոր կագալուծության որոշումը։ Ըստ էության կարգալույծ եկեղեցականը չցանկացավ ապաշխարության շրջան անցնել և վերադառնալ իր հոգևոր ծառայությանը Մայր Եկեղեցու անդաստանում։ Մայր Աթոռի որոշումը բնական հետևանքն էր նրա կայացրած որոշման։
Մայր Աթոռի Տեղեկատվական համակարգի տնօրեն Եսայի քհն․ Արթենյան
