Փաշինյանը ՀՀ առաջին ղեկավարն է, որն ուղիղ եթերում բառացիորեն ցիտել է Ալիեւի դիրքորոշումները ՄԱԿ-ի հետ կապված. Աշոտյան

1993 թվականին ՄԱԿ-ի Անվտանգության խորհուրդն ընդունեց չորս բանաձեւ, որոնց նպատակն Արցախի կարգավիճակի որոշումը չէր, այլ ռազմական գործողությունների կանգնեցնելը։ Այս մասին այսօր՝ դեկտեմբերի 27-ին, լրագրողների հետ զրույցում ասաց ՀՀԿ փոխնախագահ Արմեն Աշոտյանը:

«Սերժ Սարգսյանն է ասել, որ 2016 թվականից հետո բանակցային փաթեթը ստացավ եռամակարդակ վիճակ՝ Հայաստանի եւ Ադրբեջանի միջեւ կարգավորման սկզբունքների մասին համաձայնագիր, համանախագահ երկրների ղեկավարների մակարդակով հայտարարություն եւ ՄԱԿ-ի Անվտանգության խորհրդի որոշում։ Հիմա ասում է, որ ինքնորոշման իրավունքը գցեցին ՄԱԿ-ի անվտանգության խորհուրդ։ 1993 թվականին ՄԱԿ-ի Անվտանգության խորհուրդն ընդունեց չորս բանաձեւ, որոնց նպատակն Արցախի կարգավիճակի որոշումը չէր, այլ ռազմական գործողությունների կանգնեցնելը։ Կարմիր թելով այդ չորս բանաձեւերի մեջ մի միտքն է գնում, որ ռազմական գործողություններն անհապաղ պետք է դադարեցվեն։ 1992 թվականին արդեն իսկ ստեղծվել էր Մինսկի խումբը, 1994-1995 թվականներին Մինսկի խումբն արդեն ստացավ մանդատ կարգավիճակը քննարկելու։ Այս դեպքում Մինսկի խմբի ձեւաչափն ինչո՞ւ էին ստեղծել, եթե ՄԱԿ-ի անվտանգության խորհրդով այդ տարիներին Արցախի կարգավիճակի մասին արդեն կարգավորում կար, ընդորում՝ Մինսկի խմբի անդամ պետություններից երեքը ՄԱԿ-ի անդամ երկրներ էին։ Մարդ ցնդում է, որ ստիպված է բացատրել, թե Նիկոլն ինչ աստիճանի անբարոյական է»,- նշեց Արմեն Աշոտյանը։

Արմեն Աշոտյանի խոսքով՝ Ադրբեջանը 30 տարի այդ բանաձեւերը փորձել է խեղաթյուրել եւ օգտագործել Հայաստանի դեմ։

«Նիկոլ Փաշինյանը Հայաստանի առաջին ղեկավարն է, որը բառացիորեն ցիտել է հայկական ուղիղ եթերում Ալիեւ հոր եւ տղայի դիրքորոշումները ՄԱԿ-ի Անվտանգության խորհրդի հետ կապված։ Նիկոլ Փաշինյանը հայերենով հիմնավորել է, որ Ալիեւները ճիշտ էին, իսկ հայ ժողովուրդը՝ սխալ։ Նիկոլականներին եմ դիմում, կերաք, թե՝ մեկ է ձեզ համար»,- ասաց Արմեն Աշոտյանը։

Արմեն Աշոտյանի խոսքով՝ անթույլատրելի է քառօրյա պատերազմը համեմատելը 44-օրյա պատերազմի հետ:

«Ինչ աստիճանի անբարոյական պետք է լինի մարդ, որ քառօրյա պատերազմը համեմատի 44-օրյա հետ. 70-ից ավել զոհը՝ 5000 զոհի հետ, 400 հեկտարի կորուստը՝ 10 հազ քառակուսի կիլոմետրի հետ, հայկական կողմին հրադարարի աղերսը համեմատի ծակը մտնելու հետ, որ Պուտինն էլ չէր կարողանում գտնել, որտեղ է ։ Հղում է անում լուսահոգի Արկադի Տեր-Թադեւոսյանին, որն այսօր չի կարող թեկուզ ասել, որ նման բան եղել է։ Բա եթե հետախուզությունով կռիվ էր, բա դու չտեսա՞ր հուլիսի կեսին, որ պատերազմ է գալիս, այ անբարոյական։ Դուք չտեսա՞ք, որ հաջորդը կռիվն է: Նիկոլ, դու տավուշյան մարտերից սարքեցիր շոու։ Ասացիր, որ Տավուշյան մարտերը ապացուցեցին, որ հայկական բանակը տարածաշրջանում ամենամարտունակն է»,- ընդգծեց Աշոտյանը: