Քաղաքագետ. Ալիևի և Փաշինյանի Բրյուսելում հանդիպելուց արդյունքներ չկան
ՔԱՂԱՔԱԿԱՆՈՒԹՅՈՒՆ
regnum.ru-ն գրում է, որ դեկտեմբերի 15-ին Բրյուսելում ԵՄ միջնորդությամբ կայացած Իլհամ Ալիև-Նիկոլ Փաշինյան հանդիպումը որևէ կոնկրետ արդյունքի չի բերել։ Այդ մասին REGNUM-ի թղթակցին ասել է ՄԳԻՄՕ-ի ռազմաքաղաքական հետազոտությունների կենտրոնի առաջատար փորձագետ Միխայիլ Ալեքսանդրովը։
Փորձագետը կարծիք է հայտնել, որ կողմերի միջև ձեռք բերված բոլոր հիմնական պայմանավորվածությունները արձանագրվել են Ռուսաստանի, Հայաստանի և Ադրբեջանի 2020 թվականի նոյեմբերի 10-ի և 2021 թվականի հունվարի 11-ի համատեղ հայտարարություններում։ Այժմ Հայաստանը միայն հաստատել է, որ Զանգեզուրի միջանցքով երկաթուղային հաղորդակցություն է գործելու։ Փորձագետը նշել է, որ գործող երկաթգիծը շահավետ կլինի հենց Հայաստանի համար, քանի որ այն կարող է օգտագործվել Իրանի և Ռուսաստանի հետ հաղորդակցության համար։ «Կողմերի միջև որոշակի տարաձայնություններ կան Զանգեզուրի միջանցքի կարգավիճակի վերաբերյալ։ Հայաստանը ցանկանում է, որ այնտեղ հայկական մաքսակետեր լինեն, իսկ Ադրբեջանն իր հերթին կարծում է, որ Զանգեզուրի միջանցքը պետք է լինի արտատարածքային, ինչպես Լաչինինը»,- ասել է Ալեքսանդրովը։
Փորձագետը հիշեցրել է, որ Ռուսաստանի, Հայաստանի և Ադրբեջանի համատեղ հայտարարության մեջ նշված է, որ տրանսպորտային միջանցքով մարդկանց և ապրանքների տեղաշարժի վերահսկողությունը պետք է իրականացնի Ռուսաստանի սահմանային ծառայությունը։ Այսինքն խոսքը Զանգեզուրի միջանցքի որևէ արտատարածքային լինելու մասին չէ։ «Ինչ վերաբերում է մաքսակետերին, ապա եթե Նախիջևանից ապրանքներ են գնում Ադրբեջան, ապա ի՞նչ իմաստ ունի նման ապրանքների մաքսազերծումը։ Ռուս սահմանապահներն ամեն դեպքում ստուգելու են այդ բեռները թմրանյութերի, զենքի և ահաբեկիչների հայտնաբերման համար։ Հետևաբար, եթե դա տարանցիկ բեռ է, որը գնում է Ադրբեջան, ապա Հայաստանին ինչո՞ւ է հետաքրքրում, թե ինչ է տեղափոխվում»,- ասել է քաղաքագետը։
Մեկնաբանելով իր հերթին Լաչինի միջանցքում ադրբեջանական մաքսակետ ստեղծելու Ադրբեջանի մտադրության մասին Իլհամ Ալիևի վերջին հայտարարությունը՝ Ալեքսանդրովը նշել է, որ նման մտադրությունը հակասում է արդեն իսկ ձեռք բերված պայմանավորվածություններին, և, հետևաբար, Ադրբեջանին թույլ չեն տա դա իրականացնել։ Փորձագետը այն կարծիքն է, որ մաքսակետերի հարցը լիովին լուծելի է, և կողմերի բարի կամքի դեպքում այն կարող է իրատեսորեն իրագործվել։
Նյութը հրապարակման պատրաստեց Կամո Խաչիկյանը
