Փաշինյանին պետք է վտարել, աքսորել մի անմարդաբնակ կղզի. նա եկել է հայի վերջը տալու. Մետաքսե Հակոբյան
ՔԱՂԱՔԱԿԱՆՈՒԹՅՈՒՆ
Արցախի Ազգային Ժողովի պատգամավոր Մետաքսե Հակոբյանն ArmDaily.am-ի հետ զրույցում անդրադառնալով երեկ Նիկոլ Փաշինյանի ասուլիսի ժամանակ Արցախի վերաբերյալ հայտարարություններին, ասաց, որ արդեն մի քանի անգամ փաստել է, որ Փաշինյանի ու թիմի կողմից արված որևէ հայտարրություն իր համար անակնկալ չէ և չի ակնկալում նրանցից որևէ հայտարարություն, որ ի օգուտ Արցախի կարող է լինել:
«Իրենց ձեռքերը հիմա ավելի ազատ են այն առումով, որ իրենք սկիզբը դրեցին Արցախից ձեռքերը լվանալու և հետ քաշվելու 2020 թվականի նոյեմբերի 9-ից, իսկ այս դեկտեմբերի 10-ին Նիկոլ Փաշինյանը վերջնական փակեց Արցախի հարցը՝ Հայաստանի իշխանությունների համար: Այսինքն, ստացվել է իրավիճակ, երբ Արցախն այլև որևէ քաղաքական ձևակերպումներում չկա, երբ որևէ գործունեություն ուղղակի չկա: Այսինքն, այդ հարցը վերջնական փակվել է, մնում է 25 տոկոսի հարցը, որ Փաշինյանն իր գործընկերոջ՝ Ալիևի հետ դա էլ լուծի, վերջացնի: Իրենց ծրագիրը դա է և իրենց բոլոր հայտարարությունները բխում են հենց այդ տրամաբանությունից:
Չգիտեմ, երևի մենք ենք կոփվել ավելի շատ կամ որ գիտենք, որ այդ մարդը թուրքական գործակալ է և Ադրբեջանի շահերը սպասարկող գործակալ է և դրա համար էլ չենք զարմանում, չենք զայրանում ինչո՞ւ, որովհետև չենք զարմանում, չենք զայրանում, երբ Ալիևն է նույնկերպ հայտարարություներ անում: Ուղղակի այստեղ միակ սարսափն այն է, որ այս մարդը Հայաստանի իշխանության գլուխն է և ինքը դեռ ավելին ասեց: Ինքն ասաց, որ Արցախում պիտի գործադիր, օրենսդիր մարմնում լինեն Ադրբեջանի ներկայացուցիչներ, այսինքն տեսեք ինքն ուր է տանում: Այս մարդը պատրաստ է նաև սեփական կոմպլեքսները, ամբիցիաներին հագուրդ տալն է, նա խնդիր ունի այդ երեսուն տարիների հետ, ինքը այդ երեսուն տարիներն ապրել է միայն այդ նպատակի համար և հիմա ինքն ի՞նչ է անում, նա ուզում է տանել այդ երեսուն տարուց առաջ՝ 1988-ին և դրանից առաջ եղած վիճակը, երբ հայերը ստիպված էին Արցախում բնակվել ադրբեջանցիների հետ և բոլոր ղեկավար պաշտոնները զբաղեցնում էին ադրբեջանցիները, իսկ հայերը միայն սպասարկող անձնակազմ էին Արցախում կամ լավագույն դեպքերում միայն տեղակալներ»,-ասում է Հակոբյանը:
Արցախցի պատգամավորը նշում է, որ այն ժամանակ հայը գիտեր, որ գալու է մի ժամանակ, երբ ինքն ազատագրվելու է, ու Արցախում մնալն այնքանով է կարևոր, որ հետո ինքը կարողանար պայքարել, ապրել ու արարել իր հայրենի հողում:
«Բացի այն, որ Փաշինյանը տարավ ու շիրիմների մեջ մտցրեց մեր երեխաներին, ինքը հիմա մի ամբողջ ազգի երեսուն տարվա կյանք ջնջում է և ստացվում է այնպես, որ հատկապես իմ սերունդը, որ երիտասարդ ժամանակների մեր ամենկարևոր գաղափարն է եղել, ստացվում է, որ այդ երեսուն տարիները մենք ուղղակի չենք ապրել՝ ինքը դա է անում: Մենք ուղղակի կենդանի մեռած ենք՝ իր արածը դա է: Թող կոշտ չհնչի, բայց իրեն պարզապե վտարել է պետք, աքսորել մի անմարդաբնակ կղզի. նա եկել է ուղղակի հայի վերջը տալու ու ինքը դա սկսել է Արցախից, որովհետև երեք տարիների ընթացքում նա կարողացավ պառակտել ժողովրդին: Իշխանության գալու քարոզարշավների ժամանակ, երբ ինքը հայտարարում էր, որ ղարաբաղցիներին պետք է քշել Հայաստանից և ինքը երբեք Արցախի հային հայ չի անվանել, ասել է ղարաբաղցի: Այսինքն, իր նպատակը նախ թշնամություն, պառակտում մտցնել մեր հայկական երկու պետություններում բնակվող հայերի միջև՝ այդ պարագայում ավելի հեշտ կկարողանար չէ՞ Արցախի հարցը լուծել, կարողացավ Արցախի հարցը լուծել: Եվ հիմա սկսելով Արցախից, շարունակելով հասնելու է Հայաստանին, դա միանշանակ է ու այլ կերպ լինել չի կարող: Ինքը որևէ կերպ հետո ասելու է, որ Սյունիքում պետք է այդպես լինի, Մեղրիում պետք է այդպես լինի, ու այդպես պիտի լինի բոլոր տեղերում, որտեղ թուրքն ու ադրբեջանցին ուզում են հաստատվել: Սա ծրագիր է, ծրագիր է համատեղ ու չեմ պատկերացնում, թե էլ ինչ պիտի անեն մեր իշխանություները, որ մեր ազգը հասկանա, որ մեզ ցեղասպանում են»,-ասաց Հակոբյանը:
Հայկա Ալոյան
