Որոշ սննդային հավելումներ մեծացնում են քաղցկեղի ռիսկը. հետազոտություն
ՀԱՍԱՐԱԿՈՒԹՅՈՒՆ
Գիտնականները վաղուց գիտեն սննդային որոշ հավելումների` առողջության վրա վնասակար ազդեցության մասին։ Ֆրանսիական NutriNet-Santé-ի (Ֆրանսիա) նոր հետազոտությունը հաստատում է ավելի վաղ հնչեցված մտահոգությունները: Պարզվել է, որ որոշ սննդային հավելումներ մեծացնում են քաղցկեղի առաջացման վտանգը:
Medportal.ru-ի փոխանցմամբ՝ 2009 թվականից մասնագետները վերահսկել են ավելի քան 170 հազար կամավորների առողջական վիճակն ու ուտելու սովորությունները։
Սննդային հավելումների եւ քաղցկեղի բարձր ռիսկի միջեւ կապը գնահատելու համար գիտնականները վերլուծել են մասնակիցների զեկույցներն ամենօրյա սննդակարգի եւ արհեստական նիտրատների եւ նիտրիտների ընդունման մակարդակի վերաբերյալ, որոնք օգտագործվում են վերամշակված մսի մեջ՝ պահպանման ժամկետը երկարացնելու համար, ինչպես նաեւ` քաղցրացուցիչների եւ տրանսճարպային թթուների:
Դիտարկման ժամանակահատվածում խմբում գրանցվել է 3311 առաջնային քաղցկեղ, որից 966-ը կրծքագեղձի քաղցկեղ է, մոտ 400 շագանակագեղձի քաղցկեղի դեպք։ Գիտնականները ամուր կապ են հայտնաբերել կրծքագեղձի քաղցկեղի եւ նիտրատների ավելացման, ինչպես նաեւ շագանակագեղձի քաղցկեղի եւ նիտրիտների միջեւ:
Հետաքրքիր է, որ բնական աղբյուրներից նիտրատների եւ նիտրիտների օգտագործումը, այլ ոչ թեզ` արհեստական հավելումների տեսքով, կապված չէ քաղցկեղի առաջացման ռիսկի հետ:
Գիտնականները նաեւ կրծքագեղձի եւ շագանակագեղձի քաղցկեղի ռիսկի բարձրացում են հայտնաբերել ասպարտամ e951, ացեսուլֆամ-K e950 եւ sucralose e955 սովորական քաղցրացուցիչների ավելցուկային օգտագործման դեպքում: Այդ կապը հատկապես նկատելի էր գեր մարդկանց մոտ։
Հետազոտության ընթացքում մասնագետներն ուսումնասիրել են նաեւ քաղցկեղի առաջացման ռիսկի կապը տրանս ճարպաթթուների՝ փոփոխված քիմիական բանաձեւով ճարպերի օգտագործման հետ: Այդ նյութերը լայնորեն կիրառվում են սննդի արդյունաբերության մեջ, եւ տրանսճարպերի պարունակությամբ ֆաստ ֆուդը շարունակում է առաջատար մնալ, հատկապես` համբուրգերը, չիզբուրգերը եւ այլն։ Գիտնականները պարզել են, որ տրանս ճարպաթթուների մեծ քանակությամբ օգտագործումը կապված է քաղցկեղի, հատկապես շագանակագեղձի քաղցկեղի զարգացման ռիսկի հետ:
