Ադրբեջանը իր համար գտնելու է պաշտպանության Ռուսաստանից, քանի որ Ռուսաստանը սրում է իր հարաբերություններն Արևմուտքի հետ
ՔԱՂԱՔԱԿԱՆՈՒԹՅՈՒՆ
Բաքուն ԵԱՏՄ-ում դիտորդի կարգավիճակ է ստանալու: Տեսակետներ են հնչում, որ չի բացառվում ոչ միայն դիտորդ դառնա, այլ ԵԱՏՄ անդամ:
Այս թեմայով զրուցել ենք քաղաքագետ Անդրեաս Ղուկասյանի հետ։
Հարցին, թե ինչ կարծիք ունի այս մասին` քաղաքագետը ասաց․ «Իհարկե, խոսքն այն մասին է, որ Ադրբեջանն իր հարաբերությունները գալիք տարվա ընթացքում միջազգային հանրության հետ 44-օրյա պատերազմի պատճառով երևի աստիճանաբար կխզի, քանի որ Եվրոպայի խորհրդում պետք է գնահատական տրվի այդ հարցին ուղղված բանաձևի կետերից մեկին, թե ով է պատասխանատուն ուժի չկիրառման սկզբունքի խախտման համար: Ըստ էության, դա ագրեսիայի ճանաչումն է: Գիտեք, որ Հաագայի դատարանը Ադրբեջանից պահանջեց դադարեցնել հայերի դեմ ռասայական ատելության հրահրումը, խտրականության ցուցաբերումը, ապահովել հայ ռազմագերիների անվտանգությունը: Այս ամենը, իհարկե, բերելու է նրան, որ Ադրբեջանը իր համար գտնելու է պաշտպանության Ռուսաստանից, քանի որ Ռուսաստանը սրում է իր հարաբերություններն Արևմուտքի հետ»։
Հարցին, թե Հայաստանն ինչպե՞ս պետք է արձագանքի Ռուսաստանի այս գործողություններին` քաղաքագետն ասաց․ «Մենք տեսնում ենք, որ երբ մենք գերի ենք վերցնում, մեկ օր էլ չի անցնում, Ռուսաստանը նրանց վերադարձնում է Ադրբեջանին, մինչդեռ մենք ամիսներով մեր գերիներին թողնում ենք Ադրբեջանում: Ռուսաստանն ակնհայտորեն պաշտպանում է Ադրբեջանին, և դա ոչ մեկի համար նորություն չէ: Չեմ կարծում, թե որևէ մեկի համար դա նորություն է»: Անդրադառնալով հարցին թե Ռուսաստանի և Արևմուտքի միջև այդ լարվածությունն ինչի՞ կարող է հանգեցնել Անդրեաս Ղուկասյանն ասաց․ «Դժվար է կանխատեսել, բայց դա շատ նման է երրորդ համաշխարհային պատերազմի սկզբի: ՌԴ ղեկավարությունն այդ առիթով հայտարարել է, որ իրենք կորցնելու բան չունեն և պատրաստ են այդպիսի զարգացումների: Ըստ էության, հիմա, պատկերավոր ասած, 5 է պակաս բախումներից, հատկապես Ուկրաինայում»:
Սոնա Գիշյան
