Փաշինյանական իշխանությունը հետևողականորեն կոտրում է բանակի մեջքը
ՎԵՐԼՈՒԾՈՒԹՅՈՒՆՆԵՐ
Նիկոլ Փաշինյանի վարչախումբը Հայաստանում ամենից շատ վախենում է հայկական բանակից։ Նրա գործողությունները, բանակի վարկաբեկմանն ուղղված քայլերը, անգամ գերիների նկատմամբ վերաբերմունքը միտված է միայն մեկ բանի՝ կոտրել զինված ուժերի մեջքը, վարկաբեկել ժողովրդի աչքում, նսեմացնել հայ զինվորականի ոգին, կերպարը, քայքայել զինված ուժերը։
Պատերազմում կրած պարտությունից հետո ողջամիտ և հայրենիքը դույզն-ինչ սիրող իշխանությունը կփորձեր փայփայել, ուշքի բերել զինված ուժերը, գործուն բարեփոխումների միջոցով բանակից վերացնել արատավոր երևույթները, վերազինում և արդիականացում կիրականացներ, կվերադարձներ գերիներին։ Մինչդեռ մենք տեսնում ենք բոլորովին հակառակը։ Պաշտպանության նախարարի պաշտոնում իր ամենամոտ մարդկանցից մեկի նշանակումն էլ բանակի քայքայման օպերացիայի օղակներից մեկն է։
Փաշինյանը, իհարկե, բանակն ու նրա խնդիրները, գերիներին օգտագործում է իր քարոզչական հնարքների համար, երբ իրեն պետք է։ Իսկ երբ այլևս գերիներն իրեն պետք չեն, սկսում է անվանարկել նրանց։ Լավագույնս այդ վարքի նկարագրությունը նախօրեին ՀՀԿ համագումարում տվեց երրորդ նախագահ Սերժ Սարգսյանը։
«Պատերազմից անմիջապես հետո կապիտուլյանտ իշխանությունները հերոսացնում էին թշնամու կողմից գերեվարված մեր զավակներին, ընտրությունների նախաշեմին նրանց հարազատներին ու մեր հանրությանը սուտ խոստումներ տալիս, թե՝ մի քանի ամիս էլ համբերեք, կվերադարձնենք մեր հերոս տղաներին: Ամիսներ էլ անցան, տարի էլ, և մատը մատին չտալուց հետո, հիմա էլ ստորաբար հայտարարում են, թե՝ դեռ պետք է պարզենք այդ ի՞նչ հանգամանքներում են գերի ընկել, հնարավոր է՝ նրանք դասալիք են: Իսկ ինչո՞ւ սա չէին ասում մեկ տարի առաջ, ինչո՞ւ են իրենց անճարակությունը բարդում մեր զինվորների վրա: Բանակը քայքայելու, մինչև վերջ վարկաբեկելու սցենարի հերթական արա՞րն է»,- ասաց նա:
ՀՀԿ մեկ այլ ներկայացուցիչ, ԱԺ պատգամավոր Տիգրան Աբրահամյանն էլ երեկ է ընդգծել, թե Փաշինյանի գործունեությունն առհասարակ 2018-ից հետո ուղղված է եղել անվտանգության համակարգի փշրմանը և նրա բոլոր նախաձեռնությունները ոչ միայն ձախողվել են, այլ իրենց հետ սրբել տարել են տասնամյակներով ստեղծվածը։
«Փաշինյանը շարունակում է ոչնչացնել համակարգեր, որին մասնակից բոլոր ուժերն ու գործիչները՝ անկախ անձնական ու մասնագիտական որակներից, իշխող թիմում հայտնված հանգամանքներից, պատասխանատվություն են կրելու նրա բոլոր արարքների՝ արածների ու չարածների համար»,- նշել է Աբրահամյանը։
Խաչատուր Սարգսյան
