Փաշինյանական թայֆաբազության հետևանքները աղետալի են լինելու

Երևան քաղաքի ավագանին այսօր արտահերթ նիստ է գումարել՝ քննարկելու քաղաքապետ Հայկ Մարությանին անվստահություն հայտնելու և «Առաքելություն» կուսակցությունից ճողոպրած Հրաչյա Սարգսյանին նոր քաղաքապետ ընտրելու հարցը։ «Իմ քայլը» խմբակցությունը երեկ բոյկոտել էր ավագանու հերթական նիստը, որի օրակարգում առանցքային և կարևոր հարցեր պիտի քննարկեին։ Փաշինյանականները, թերևս, երես չէին ունեցել նիստին ներկայանալու, կենսական նշանակության հարցեր քննարկելու։ Փոխարենն այսօր ողջ կազմով ներկայացել են արտահերթ նիստին, Հայկ Մարությանին մեղադրելու տարատեսակ մեղքերի մեջ։

Այն, որ Երևանում իշխանությունը վերցնելու, միակ արդյունավետ պաշտոնյա Հայկ Մարությանին հեռացնելու համար Նիկոլ Փաշինյանը ոչնչի առջև կանգ չէր առնի, թերևս ապացուցելու կարիք էլ չկա։ Բացի նրանից, որ Հայկ Մարությանի վարկանիշն ավելի բարձր է, քան «ժողովրդի» վարչապետի, կա ևս մեկ հանգամանք։ Փաշինյանը գրոհում է բոլոր ՏԻՄ-երը՝ առաջիկայում սահմանադրական փոփոխություններ կատարելու, սեփական իշխանությունն ամրապնդելու համար։ Եվ Երևանն առաջնային նշանակություն ունի այդ իմաստով։ Ընտրողների մեկ/երրորդը Երևանում են, հարկավոր է միավորել վարչական ռեսուրսը՝ իշխանության հետագա զավթումն իրականացնելու համար։

Փաշինյանն ու նրա թիմը կանգ չեն առնում անգամ սեփական թիմակիցներին ահաբեկելու հարցում։ «Իրազեկ քաղաքացիների միավորումը» հանցագործության մասին հաղորդում է հղել գլխավոր դատախազին՝ կապված Երևան քաղաքի ավագանու անդամների վրա ճնշումներով:

«Մասնավորապես, կարծում ենք, որ իշխանության բարձրաստիճան ներկայացուցիչների կողմից «Իմ քայլը» խմբակցության մի շարք ավագանու անդամների վրա ճնշումներում առկա է քրեական օրենգրքի 311.2 հոդվածով նախատեսված հանցակազմ: Ավելին, հաշվի առնելով, որ ճնշում գործադրողները բարձրաստիճան պաշտոնատար անձինք են, դատախազությունից խնդրել ենք միջոցներ ձեռնարկել վկաների պաշտպանության ուղղությամբ»,- նշել է Դանիել Իոաննիսյանը։

Դավիթ Գաբրիելյան