Միջկառավարական հանձնաժողովը հնարավորություն է ինստիտուցիոնալ ձևով երկու երկրների միջև հարաբերությունների խորացման համար
ՔԱՂԱՔԱԿԱՆՈՒԹՅՈՒՆ
Հայաստանի Հանրապետության և Վրաստանի միջև տնտեսական համագործակցության միջկառավարական հանձնաժողովի 11-րդ նիստի շրջանակներում ՀՀ վարչապետն այցելել էր Վրաստան։
Այս թեմայով զրուցել ենք վրացագետ Ջոնի Մելիքյանի հետ։
Հարցին, թե ինչ կարծիք ունի ՀՀ վարչապետի այցից վրացագետն ասաց․ «Հանդիպումն ու միջկառավարական հանձնաժողովի նիստի ավարտին ստորագրված հուշագիրը դրական եմ գնահատում: Դա շատ կարևոր էր, քանի որ միջկառավարական հանձնաժողովը հնարավորություն է ինստիտուցիոնալ ձևով երկու երկրների միջև հարաբերությունների խորացման համար։ Քանի որ անցյալ տարի այդ նիստը չկայացավ ու տեղափոխվեց այս տարի, դա հնարավորություն էր ամփոփելու այս վերջին երկու տարվա համագործակցությունը և նոր ուղիներ մատնանշելու տարբեր ուղղություններով։ Բացի դրանից, շատ կարևոր է, որ այս փոփոխվող տարածաշրջանում, որտեղ շատ ավելի անհրաժեշտ է դարձել երկու երկրի հարաբերությունների խորացումը, շատ ավելի ակտիվ հանդիպումներ լինեն, ու կողմերը քննարկեն նաև տարածաշրջանային գործընթացները։ Նաև շատ կարևոր ու տեսանելի է, որ Հայաստանի ու Վրաստանի ղեկավարների միջև միջանձնային շատ լավ հարաբերություններ կան։ Ինստիտուցիոնալ առումով էլ տեսանելի է, որ համատեղ քննարկումները շարունակական են, ինչն էլ հույս է տալիս, որ բոլոր նախանշված ուղղություններով համագործակցությունը կշարունակվի գալիք տարի։ Կարևոր է, որ էկոնոմիկայի նախարարները քննարկեցին բարձրավոլտի կառուցման ծրագիրը, ինչը ոչ միայն մեր էներգահամակարգերն է կապելու ապագայում, այլ նաև հնարավորություն կտա տրանզիտ երկիր հանդիսանալ հարևան երկրների միջև՝ էլեկտրաէներգիայի փոխանակման գործում: Եթե դրան զուգահեռ մոտակա տարիներին կառուցվի նաև Իրան-Հայաստան բարձրավոլտը, ապա դա հնարավորություն կտա թե՛ Վրաստանին Իրանի հետ էլեկտրաէներգիայի փոխանակման, թե՛ Ռուսաստանին՝ Իրանի հետ ու մեր տարածքում, սա հնարավորություն կտա իրականություն դարձնել էներգակամուրջի գաղափարը, որի մասին առնվազն վերջին երեք-չորս տարին խոսվում է։ Տարածաշրջանային ապաշրջափակման այս գործընթացում կարևոր է, որ Երևանն ու Թբիլիսին սինքրոնիզացնեն քայլերն ու փորձեն համատեղ նախաձեռնություններով հանդես գալ։ Կա հնարավորություն, կան ուղղություններ, որոնց հետ կապված կան շատ լավ նախադրյալներ, ուղղակի պետք է ակտիվ աշխատանք այս միջկառավարական հանձնաժողովով օրակարգ ձևավորելու, փոխելու»։
Սոնա Գիշյան
