Ինչո՞ւ են սուրբծննդյան արձակուրդի օրերին մարդիկ ավելի հաճախ մահանում

Սուրբծննդյան եւ ամանորի տոներին սիրտ-անոթային հիվանդություններից մահացության ցուցանիշն աճում է: Մելբուռնի համալսարանի գիտնականների կարծիքով՝ պատճառն ամենեւին էլ ցուրտ եղանակը չէ, այլ այն, որ տոնական օրերին վատ զգացող մարդիկ պարզապես չեն ուզում բժշկի դիմել:

Ոմանք դիմանում են վատ ինքնազգացողությանը՝ չցանկանալով փչացնել իրենց տոնական տրամադրությունը: Մյուսներն էլ կարծում են, որ այդ օրերին հիվանդանոց պառկելն անօգուտ է, քանի որ բուժաշխատողները տոներով են զբաղված: Այսպես թե այնպես, նման հիվանդները տանն են մնում, իսկ առանց բուժօգնության մահվան վտանգը զգալիորեն աճում է: Շատերը նաեւ այդ օրերին արտերկիր են մեկնում, եւ երբ վատ են զգում, հեռու են լինում իրենց բուժող բժիշկներից: Դա նույնպես կարող է արձակուրդի օրերին մահացության թվի աճի գործոններից մեկը լինել:

Հետազոտողների խոսքով՝ ԱՄՆ-ում վիճակագրությունը դեկտեմբերի 25-ից մինչեւ հունվարի 7-ն ընկած ժամանակահատվածում սրտի հիվանդություններից մահացության կտրուկ աճ է արձանագրել: ԱՄՆ-ում դա նաեւ տարվա առավելապես ցուրտ շրջաններից է, այդ պատճառով երկար ժամանակ մահացության բարձր մակարդակը կապում էին հենց ցրտի հետ: Բայց ցուրտը չի կարող բացատրել սուրբծննդյան տոներին մահացության նման բարձր ցուցանիշը Նոր Զելանդիայում, որտեղ դեկտեմբեր-հունվարին ամառ է:

Ընդհանուր առմամբ՝ ամանորյա տոների արձակուրդի ընթացքում սրտի հիվանդությունների հետեւանքով մահացության մակարդակն աճում է շուրջ 4.2%-ով: Ընդ որում, հետազոտությունը նաեւ ցույց է տվել, որ եթե այդ հիվանդություններից մահացողների միջին վիճակագրական տարիքը 77.1 տարեկանն է, ապա արձակուրդի օրերին նվազում է՝ հասնելով 76.2 տարեկանի: