Փաշինյանը սկսում է վերաձևել սահմանադրությունը իր հագով
ՎԵՐԼՈՒԾՈՒԹՅՈՒՆՆԵՐ
«Վարչապետ» կոչումը Նիկոլ Փաշինյանին դուր չի գալիս, երկիրը նվաստացման և պարտության տարած ապիկարը հիմա էլ վերաձևում է ՀՀ Սահմանադրությունը՝ այն իր քիմքին համապատասխանեցնելով։ Փաշինյանի որոշմամբ սկսվել է սահմանադրական բարեփոխումների խորհրդի ձևավորման գործընթացը, նախորդ հանձնաժողովի գործունեությունը կասեցվել է։ Խորհուրդը նախագահելու է արդարադատության նախարարը, իսկ մինչև հունվարի կեսեր այն պետք է ձևավորված լինի։
Հունվարի 17-ին արդեն խորհրդի կազմը պետք է ներկայացվի վարչապետի աշխատակազմին, այն հաստատելուց հետո, խորհուրդն իր հերթին կձևավորի քաղաքական ուղղվածություն չունեցող 5 գիտնական մասնագետներից կազմված հանձնաժողով, որոնք կզբաղվեն Սահմանադրական բարեփոխումների նախագծի մշակմամբ։ Առայժմ, իհարկե, որևէ տեղեկություն չկա, թե ինչ փոփոխություններ են ծրագրվում, Փաշինյանը, սակայն, դեռ մարտին էր ասել, որ կիսանախագահական կառավարման համակարգի անցնելը հնարավոր տարբերակներից մեկը պետք է լինի։
Ամենայն հավանականությամբ, նա ցանկանում է միանձնյա ղեկավարել երկիրը, իսկ դրա համար հարկավոր է նախ բարձրացնել սեփական տիտղոսը, հետո էլ՝ հեռացնել հնարավոր մրցակիցներին։ Իսկ Փաշինյանը, նշենք, մրցակից համարում է յուրաքանչյուրին, այդ թվում՝ որևէ լիազորությունից զրկված, սակայն արտերկրում լուրջ կապեր և հեղինակություն ունեցող, ՀՀ նախագահ Արմեն Սարգսյանին։ Կիսանախագահականի անվան տակ Կարեն Անդրեասյանի ղեկավարած խորհուրդը Սահմանադրությունը կվերածի Փաշինյանի ընտանեկան թերթի հավելվածի, անսահմանափակ լիազորություններով կօժտի դավադիր փոքրիկ բռնապետին։ Որևէ կասկած այս հարցում, չունենք։
Նարեկ Սահակյան
