Մենք ոչ մի դեպքում Ռուսաստանի մրցակիցը չենք. Ալիև

Ադրբեջանն ու Ռուսաստանը եվրոպական շուկաներ գազի մատակարարման հարցում մրցակիցներ չեն, հայտարարել է Ադրբեջանի նախագահ Իլհամ Ալիևը։

«Նախ՝ այս հարցը երբեք չի քննարկվել երկու երկրների ղեկավարների մակարդակով, երկրորդ՝ Ռուսաստանը հարգում է մեր քաղաքականությունը, արտաքին քաղաքականությունը, էներգետիկ քաղաքականությունը, մենք մրցակիցներ չենք, ես բազմիցս հայտարարել եմ, որ այդ հարցը արհեստականորեն է արվում: Մենք ոչ մի դեպքում Ռուսաստանի մրցակիցը չենք», - ասել է Ալիևը իտալական Il Sole 24 Ore թերթին տված հարցազրույցում։

Նրա խոսքով, Ռուսաստանը հարյուր միլիարդավոր խորանարդ մետր գազ է արտահանում Եվրոպա, իսկ ռուսական գազի պահանջարկն աճում է։ «Ադրբեջանը նոր է սկսել գազ մատակարարել Եվրոպա, 2023 թվականին ադրբեջանական գազի մատակարարումների ծավալը Եվրոպա կհասնի 11 միլիարդ խորանարդ մետրի, իսկ եթե նոր պայմանագրեր, ներդրումներ չլինեն արտադրության մեջ, մատակարարումների ծավալը կարող է մնալ այս մակարդակի վրա։ Ուստի ոչ մի դեպքում չէր կարող բացասաբար ազդել Ռուսաստանի հետ մեր շատ դրական և հավասարակշռված հարաբերությունների վրա»,- ընդգծել է Ադրբեջանի նախագահը։

Ալիեւը նշել է, որ Ադրբեջանը գազ է մատակարարում Եվրոպա Հարավային գազային միջանցքով։ «2021 թվականի հունվարի 1-ից մենք 7,2 միլիարդ խորանարդ մետր ադրբեջանական գազ ենք մատակարարել Իտալիա, Հունաստան և Բուլղարիա: 2022 թվականին մատակարարումների ծավալը նախատեսվում է 9 միլիարդ խորանարդ մետր, 2023 թվականին՝ 11 միլիարդ խորանարդ մետր»,- ընդգծել է նա։ .