Հայ-թուրքական բանակցությունները՝ ամոթի ու խարանի նոր աղբյուր

Թուրքիան չափազանց լուրջ է մոտենում Հայաստանի հետ հարաբերությունների կարգավորման բանակցություններին և 37 տարվա դիվանագիտական փորձով դիվանագետ է նշանակելու որպես բանագնաց Թուրքիայի ԱԳ նախարար Մևլյութ Չավուշօղլուն: Նա նաև նշել է, որ ծրագրում են Հայաստանում հատուկ ներկայացուցչին նշանակել փետրվարի 14-15-ն ընկած ժամանակահատվածում։ Սերդար Քըլըչը, 1984 թվականից սկսած, աշխատում է Թուրքիայի արտաքին գերատեսչությունում։ 2006-2008 թվականներին Թուրքիայի ԱԳՆ-ի ՆԱՏՕ-ի հարցերով վարչության ղեկավարի օգնականի պաշտոնն է զբաղեցրել, 2008-2010 թվականներին Բեյրութում եղել է Թուրքիայի դեսպանը: 2010-2012 թվականներին եղել է Ազգային անվտանգության խորհրդի գլխավոր քարտուղար, 2012-2014թթ.՝ Տոկիոյում, 2014-2021թթ.՝ Վաշինգտոնում Անկարայի դեսպանը: Այսպիսի կենսագրություն ունեցող անձի նշանակումը վկայում է հարևան պետության տրամադրվածությունը՝ սեփական շահերը ամեն գնով առաջ մղելու վերաբերյալ։ Իհարկե, Հայաստանի Հանրապետությունում դժվար է գտնել համարժեք փորձառություն ունեցող դիվանագետի, սակայն կան փորձառու, տարբեր միջազգային բանակցություններում հմուտ դիվանագետներ, որոնք կարող են հավասարը հավասարի հետ բանակցել թուրքերի հետ, պնդել և առաջ մղել հայկական շահերը։

Հայկական կողմն առայժմ չի հայտնել իր թեկնածուի անունը, բայց և չի հերքել մամուլում տարածվող տեղեկությունները, թե այդ առաքելությունը հանձնարարվելու է ԱԺ փոխնախագահ Ռուբեն Ռուբինյանին։ 31-ամյա Ռուբինյանը իր աշխատանքային գործունեությունը սկսել է երեք տարի առաջ՝ իշխանափոխությունից հետո նշանակվելով ԱԳ փոխնախարար։ Ապա եղել է ՀՀ ԱԺ արտաքին հարաբերությունների հանձնաժողովի նախագահը։ Չունի ո՛չ համապատասխան փորձ, ո՛չ բանակցելու հմտություններ։ Նրա կենսագրության միակ ուշագրավ հատվածը 2017-2018 թվականներին ստացած կրթությունն է․․․Ռուբինյանը «Հրանտ Դինք» հիմնադրամի «Հայաստան-Թուրքիա Փորձի փոխանակման նախագծի» շրջանակներում հետազոտություն է իրականացրել Թուրքիայի Հանրապետությունում գործող Սաբանջը համալսարանին կից գործող «Ստամբուլի քաղաքականության կենտրոնում»։ Նրա հետազոտությունը նվիրված է Թուրքիայի ժողովրդավարացման գործընթացում հասարակական կազմակերպությունների ունեցած ազդեցությանը։ Թերևս, հասկանալի է, որ եթե այդ բանակցություններում Հայաստանի Հանրապետությունը ներկայացնի նման անձը, ապա մեր խնդիրները կբազմապատկվեն, իսկ Հայաստանի շահերը ոտնատակ կլինեն։

Ռոբերտ Այվազյան