Փորձագետ. Ռուսաստանը Հայաստանին չի դավաճանել ղարաբաղյան երկրորդ պատերազմի ժամանակ
ՀԱՍԱՐԱԿՈՒԹՅՈՒՆ
rossaprimavera.ru–ն գրում է, որ Հայաստանում էական հակառուսական տրամադրություններ չկան, հանրապետությունում մարդիկ միշտ հավատացել են, որ միայն Ռուսաստանի հետ հնարավոր առավելագույն մերձեցմամբ կարելի է երաշխավորել սեփական անվտանգությունը: Այդ մասին հայտարարել է ավստրիացի քաղաքագետ, բ.գ.թ. Մարտին Մալեքը: Փորձագետը համաձայն չէ այն պնդման հետ, թե իբր Ռուսաստանը չի օգնել Հայաստանին: Նրա խոսքով, 44-օրյա պատերազմը բազմաթիվ հարցեր է թողել և դրանցից մեկը նոյեմբերի 8-ին Շուշիի անկումից հետո ադրբեջանական բանակի հարձակումը Ստեփանակերտի վրա դադարեցնելու հարցն է։ «Հայկական դիմադրությունը դրանից հետո չէր կոտրվել, բայց խիստ թուլացել էր, իսկ ադրբեջանական բանակը կարող էր գրավել Ստեփանակերտը, ինչը կնշանակեր «Արցախի Հանրապետության» վերջը։ Ինչո՞ւ նրանց կանգնեցրին: Այդ հարցի ամենահավանական պատասխանը եղել և մնում է այն, որ Մոսկվան հզոր քաղաքական, և ոչ միայն, ճնշում է գործադրել Բաքվի վրա: Այդ մասին են վկայում նաև ռուսական տարբեր բաց աղբյուրները»,- ասել է փորձագետը։ Որպես օրինակ նա բերել է Վլադ Բեժինի հոդվածը, որտեղ ասվում է, որ Ռուսաստանը ոչ մի կերպ չի կարող իր հայ դաշնակցին զիջել թշնամուն, քանի որ Երևանում դա կդիտվի որպես բացահայտ դավաճանություն, հատկապես այն փաստի ֆոնին, որ Ադրբեջանի բանակն ավելի ուժեղ և ժամանակակից է, և նրան աջակցում է Թուրքիան։
Բացի այդ, Մալեքը հիշեցրել է 2020 թվականի աշնանը ռուսական Կասպյան նավատորմի կողմից Բաքվի անմիջական մերձակայքում իրականացված զորավարժությունները, որոնք չէին կարող պատահական լինել։ Նրա խոսքով, այդ գործողությունները հետագայում գրեթե աննկատ են մնացել հասարակության լայն շրջանակների կողմից։ Բացի այդ, փորձագետը նշել է Վագների մասնավոր ռազմական ընկերությունը, որը ենթադրաբար կարող էր մասնակցել նաև Լեռնային Ղարաբաղի 44-օրյա պատերազմի ռազմական գործողություններին։ Սակայն փորձագետը նաև նշել է, որ այս հարցում հստակություն չկա։
Մալեկը, այնուամենայնիվ, կարծում է, որ Ռուսաստանը կարող էր Հայաստանի համար ռազմական առումով ավելին անել, քան արել է։ «Ռուսաստանի հարաբերական պասիվությունը բացատրվում է նրանով, որ նա ցանկանում էր ստիպել Փաշինյանին վճարել իրենից «վանվելու» և դեպի Արևմուտք «շրջվելու» համար (չնայած իրականում ոչ մեկը, ոչ մյուսը տեղի չի ունեցել): Այսինքն մենք օգնում ենք միայն ակնհայտ պրոռուսական ռեժիմներին և քաղաքական գործիչներին, իսկ դուք մեզ համար բավականաչափ ռուսամետ չեք»,- նշել է փորձագետը։
Նյութը հրապարակման պատրաստեց Կամո Խաչիկյանը
