Նիկոլ Փաշինյանի ռեպրեսիվ մեքենան նոր թափ է հավաքում

Հայաստանի գործող իշխանությունները՝ Նիկոլ Փաշինյանի գլխավորությամբ, այլևս անթաքույց և ծայրաստիճան անբարոյական արշավ են սկսել ընդդիմության ներկայացուցիչների դեմ։ Քննչական կոմիտեի հաղորդմամբ՝ Վանաձորի նախկին քաղաքապետ Մամիկոն Ասլանյանը երեկ ձերբակալվել է և ներգրավվել որպես մեղադրյալ։

Վանաձորի քաղաքապետի պաշտոնի հավակնորդ Ասլանյանը, որի առաջնորդած դաշինքը դեկտեմբերի 5-ի տեղական ընտրություններում ստացել է առավելագույն՝ 38.7 տոկոս ձայն, ըստ իրավապահների, առերևույթ չարաշահել է իր պաշտոնական լիազորությունները, պաշտոնեական կեղծիք կատարել։ Ասլանյանի ձերբակալությունը քաղաքական հետապնդման դասական օրինակ է։ Դեկտեմբերի 20-ին կայանալու է Վանաձորի նորընտիր ավագանու առաջին նիստը, որի ընթացքում էլ քաղաքապետ են ընտրելու։ Այս քայլով փաշինյանական իշխանությունները փորձում են կանխել Ասլանյանի վերընտրությունը։

Նիկոլ Փաշինյանն անձնական վիրավորանք է համարում իր ընտանիքի սերտ բարեկամ Արամ Խաչատրյանի պարտությունը, ամեն ինչ անում է՝ ՀՀ երրորդ քաղաքում իրերի դրությունը հօգուտ «Քաղաքացիական պայմանագրի» փոխելու համար։ Երեկ ԱԱԾ է հրավիրվել և որպես վկա հարցաքննվել ԱԺ ընդդիմադիր «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանը։ Իսկ ԱԺ մյուս ընդդիմադիր խմբակցության՝ «Հայաստան» դաշինքի ղեկավար Սեյրան Օհանյանին երեկ տիկնոջ՝ Ռուզաննա Խաչատրյանի հետ հրավիրել էին Գլխավոր դատախազություն։ Նրանց հրավիրել էին ապօրինի ծագում ունեցող գույքի բռնագանձման գործընթացի շրջանակում ծանոթանալու իրենց վերաբերող գույքի ուսումնասիրություններին։ Հիշեցնենք, որ Սեյրան Օհանյանի գույքի վրա կալանք է դրվել։ Դատարանը երեկ երկամսյա կալանք նշանակեց ընդդիմադիր ակտիվիստ Նարեկ Մանթաշյանի նկատմամբ, իսկ մեկ այլ Նարեկի՝ Սամսոնյան ազգանունով, ձերբակալեցին նախօրեին։ Այս ամենը վկայում է, որ Նիկոլ Փաշինյանն ինչ-որ սարսափելի և վտանգավոր բան է նախապատրաստում Հայաստանի Հանրապետության դեմ, և ընդդիմության դեմ լայնածավալ ռեպրեսիաները երկու նպատակ ունեն՝ նախ, թուլացնել ընդդիմությանը, և, երկրորդ, նմանատիպ շոուներով շեղել հանրության ուշադրությունը։

Տիգրան Ավանեսյան