Բաղդասարով. Ղարաբաղում Հայաստանի պարտության պատճառը Փաշինյանի դավաճանությունն է
ՀԱՍԱՐԱԿՈՒԹՅՈՒՆ
sm.news-ը գրում է, որ գործող վարչապետ Նիկոլ Փաշինյանի և նրա թիմի Հայաստանում իշխանության գալը դարձել է ղարաբաղյան պատերազմում երկրի պարտության հիմնական պատճառը: Նման կարծիք է հայտնել ռուս քաղաքագետ, պատմաբան, Մերձավոր Արևելքի և Կենտրոնական Ասիայի երկրների հիմնախնդիրների փորձագետ Սեմյոն Բաղդասարովը: Նրա խոսքով, այն բանի արդյունքում, որ Ռուսաստանը չկարողացավ ամրապնդվել Հայաստանում, 2018 թվականին իշխանության եկավ մի մարդ, ով սերտորեն կապված էր Արևմուտքի, Մեծ Բրիտանիայի և ԱՄՆ-ի հատուկ ծառայությունների հետ։ Խոսքը երկրի վարչապետ Նիկոլ Փաշինյանի մասին է։ «Մենք հաճախ ենք ասել, որ Հայաստանում է գտնվում ԱՄՆ-ի աշխարհի ամենամեծ դեսպանատներից մեկը։ Իր կառուցման ժամանակ՝ 2005 թվականին, այն իսկապես աշխարհի ամենամեծ դեսպանատունն էր՝ ավելի քան 90 հազար քառակուսի մետր տարածք ավելի քան երկու հազարանոց անձնակազմով: Փոքր Հայաստանի ինչի՞ն է պետք նման հսկայական ամերիկյան դեսպանատունը։ Ամեն ինչ շատ պարզ է. Միացյալ Նահանգները մեծ աշխատանք են կատարել Հայաստանը Ռուսաստանից անջատելու համար, քանի որ դա կնշանակի Ռուսաստանի ներկայության ավարտ Հարավային Կովկասում դրանից բխող բոլոր հետևանքներով»,- ասել է փորձագետը։ Բաղդասարովը վստահ է, որ Հայաստանը միտումնավոր է հեռացվել Ռուսաստանից, և այս հարցում հնարավոր է եղել որոշակի հաջողությունների հասնել։ «Բրիտանացիները, և հատկապես ամերիկացիները, ակտիվորեն են աշխատել այնտեղ, ռուսաֆոբական տրամադրություններ են ստեղծել ամենատարբեր անհեթեթություններ տարածելով, մասնավորապես, որ Հայոց ցեղասպանության մեղավորը ոչ թե Թուրքիան է, այլ Ռուսաստանը։ Այսպիսով, առաջ են մղվել նաև Թուրքիայի շահերը։ Իսկ հիմա իշխանության է եկել մի հայտնի գործիչ, ես նրա անունը չեմ անի, ով սկսել է ամեն ինչ անել, որպեսզի ի վերջո այդ խնդիրը լուծվի։ Ղարաբաղյան պատերազմում պարտությունն առաջին հերթին դավաճանություն է Հայաստանի ղեկավարության կողմից։ Նման պարտությունից հետո հայկական բանակի գերագույն գլխավոր հրամանատարն ասել է, որ վերլուծություններ ու եզրակացություններ պետք չեն, ամեն ինչ լավ է»,- հեգնել է քաղաքագետը։
Նյութը հրապարակման պատրաստեց Կամո Խաչիկյանը
