Բանակցությունները հասարակությունից գաղտնի են պահվում
ՔԱՂԱՔԱԿԱՆՈՒԹՅՈՒՆ
Թուրքիայի ԱԳ նախարարը նշել էր, որ Անկարան և Երևանը հարաբերությունների կարգավորման համար հատուկ ներկայացուցիչներ կնշանակեն, կբացվի նաև ավիահաղորդակցությունը: ՀՀ ԱԳՆ-ն էլ դրական է գնահատել Թուրքիայի պատրաստակամությունը և նշել, որ հայկական կողմը ևս երկխոսության համար հատուկ ներկայացուցիչ կնշանակի:
Այս թեմայով զրուցել ենք թուրքագետ Անդրանիկ Իսպիրյանի հետ։
Հարցին, թե ի՞նչը հիմք հանդիսացավ, որ երկու երկրներն էլ երկխոսություն սկսելու պատրաստակամություն հայտնեցին՝ թուրքագետն ասաց. «Եթե հաշվի չառնենք այս հայտարարությանը նախորդած դեպքերը, միայն այս հայտարարությունը լսելով կարող ենք ասել, որ Թուրքիայի հայտարարությունը ողջունելի է ու նա դրական քայլ է անում, բայց… Նախ՝ ավիահաղորդակցության մասով. Ստամբուլի ու Երևանի միջև վաղուց կան ավիաթռիչքներ, առնվազն 20 տարի, ուղղակի ավիաթռիչքներ իրականացնող թուրքական ավիաընկերությունը սնանկացավ, այսինքն՝ զուտ օբյեկտիվ պատճառներով, անկախ քաղաքական թեմաներից, այդ թռիչքները դադարեցվել են: Ստացվում է, որ Թուրքիան այս հարցը մանիպուլացնում է, իսկ այս հայտարարությանը նախորդող դեպքերին երբ նայում ենք` ամբողջովին այլ պատկեր է ստացվում: Թուրքիան խոսել է նախապայմանների լեզվով, ավելին՝ Հայաստանի համար անընդունելի նախապայմանների լեզվով, և երկրորդ՝ Թուրքիան Հայաստանի հետ հարաբերությունների կարգավորումը պայմանավորում է Ադրբեջանով: Չավուշօղլուի հայտարարության մեջ շեշտվում է, որ Թուրքիան Հայաստանի հետ հարաբերությունների կարգավորումն իրականացնելու է Ադրբեջանի հետ համաձայնեցնելով: Սա ի՞նչ է, եթե ոչ նախապայման, սրան էլ գումարած՝ Թուրքիան իր նախորդ նախապայմաններից չի՞ հրաժարվել, թե՞ հրաժարվել է, ցավոք, մենք դրա մասին չգիտենք: Բանակցությունները հասարակությունից գաղտնի են պահվում, ու նույնիսկ փորձագետները կդժվարանան հստակ ասել, թե ինչ նախապայմանների շուրջ են բանակցելու կողմերը: Ուրախ կլինեմ, որ ընդհանրապես նախապայմաններ չլինեն, բայց դա ֆանտաստիկայի ժանրից է: Նախորդ հարաբերությունների կարգավորման ժամանակ էլ, երբ նույնիսկ փաստաթուղթ հրապարակվեց , որ առանց նախապայմանների պետք է լինեն հարաբերությունների կարգավորումները, Թուրքիան հրաժարվեց իր իսկ ստորագրած փաստաթղթից»։
Սոնա Գիշյան
