Գիտնականներն առաջին անգամ ներկայացրել են Երկիր մոլորակի պատմության մեջ ամենասարսափելի աղետի մանրամասները
ՀԱՍԱՐԱԿՈՒԹՅՈՒՆԳիտնականներն առաջին անգամ ներկայացրել են Երկիր մոլորակի պատմության մեջ ամենասարսափելի աղետի մանրամասները: Նրանց համաձայն՝ այդ աղետից հետո ոչնչացել է ծովային կենդանիների 95%-ը և ցամաքային կենդանիների 75%-ը: Քսենյա Պանկովայի հեղինակած հոդվածը վերցրել ենք «Взгляд»-ից:
Օվկիանոսի հետազոտության կենտրոնի և Գերմանիայում Հելմհոլցի անվան երկրաբանական գիտությունների հետազոտության կենտրոնի հետազոտողներն առաջին անգամ մանրամասնորեն ներկայացրել են 252 մլն տարի առաջ տեղի ունեցած համաշխարհային աղետը: Աղետի պատճառը, ըստ գիտնականների, եղել է ներկայիս Սիբիրի տարածքում հրաբխային ակտիվությունը:
Գիտնականները հետազոտել են բրածո բրախիոպոդների խեցիները, ինչը թույլ է տվել աղետից առաջ և հետո հաստատել ծովի ջրի pH-ի նշանակության փոփոխությունը: Նշվել է, որ pH-ի մակարդակն ազդում է մթնոլորտում ածխաթթու գազի պարունակության վրա: Հետազոտողները պարզել են, որ արտազատված մագմայի մեծ քանակության պատճառով մթնոլորտում մեծ քանակությամբ ածխաթթու գազ է հայտնվել: Այդ գազը մի քանի հազարամյակ դուրս է եկել մակերես և հանգեցրել ուժեղ ջերմոցային էֆեկտի՝ առաջացնելով ուժեղ տաքացում և օվկիանոսի թթվեցում: Դա հանգեցրել է ծովային կալցիֆիկացվող օրգանիզմների անհետացմանը:
Բացի այդ, ջերմոցային էֆեկտը պայմանավորել է քիմիական հողմահարումը ցամաքում: Բազմաթիվ սննդանյութեր ընկել են օվկիանոսներ՝ դրանք չափից շատ պարարտացնելով, աճել է թթվածնից զրկված մեռյալ գոտիների թիվը: Միանգամից մի քանի գործոնների փոխազդեցությունը կենդանիների տարբեր խմբեր է ոչնչացրել:
Հետազոտողների խմբի ղեկավար Հանա Յուրիկովան նախազգուշացրել է, որ հրաբխային արտանետումների համեմատությունը մարդածին ածխածնի արտանետման հետ համեմատելը սխալ է: Նա նշել է, որ ողջ հանածո վառելիքի օգտագործումը չի հանգեցնի ածխածնի օքսիդի այնպիսի կոնցենտրացիայի, ինչպիսին ձևավորվել է 252 մլն տարի առաջ:
-Սակայն մտահոգիչ է այն փաստը, որ ջերմոցային գազի կուտակման տեմպերն այժմ 14 անգամ գերազանցում են Երկրի պատմության մեջ մեծագույն կենսաբանական աղետի ժամանակ դիտված տեմպերին, - նշել է գիտնականը:
Նյութը հրապարակման պատրաստեց Լիլիթ Ամիրաղյանը